Donald Trump-a'n Kristian-te venhim a tiam

US President thlanna neih tura Republican president candidate chuhtu zinga mi, Donald Trump chuan Kristian-te venhima, America chu ram ropuia siam leh a tiam.

Thawhṭanni khan Trump hian Concord, New Hampshire-ah campaign rally a nei a, hetah hian khawvelah a lehkhabu ziah, Art of the Deal aia ṭha awmchhun chu Bible chauh a ni, a ti.

Nimin khan Virginia-a Liberty University zirlaite bulah hun a hmang leh a, hetah hian Kristiante humhalh leh venhim tlat a tum thu a sawichhuak a ni.

"Khawvel hmun hrang hranga thil thlengte in thlir chuan, Kristiante chuan beih an tawk reng a ni. Kristiante hi kan venghim tlat dawn a ni," a ti. Trump hian a hmain US-a Muslim lut turte khuahkhirh a lo rawt tawh vangin beih a tawk nasa hle.

Liberty University president hian zirlaite hnenah Muslim-te zirtirna pe tura silai kah dan zir a, ralthuam keng reng turin zirlaite a lo fuih tawh bawk a, an univesity-a Trump-a thusawi hi a thlawp hle a, Isua zirtirna zawmtu a ni, a ti.

Republican candidate chuh tumte zingah Trump hian hma a la hruai mek a, amah hnaih bertu Ted Cruz thlawptu evangelical Kristiante hneh tumin a bei mek a, mipui ngaihdan lak hnuhnung berah pawh evangelical zingah Trump hian thlawptu a ngah tawh zawk.

Hetihlai hian Donald Trump-a'n US-a Muslim pem luh khap a rawtna chuan sawisel a la hlawh chhunzawm zel a, British MP-te chuan a thusawi avanga UK-a Trump a kal khapsak tura ngenna chungchang chu Parliament-ah an sawiho.

Muslim chungchang a sawi vang hian United Kingdom-a cheng mipui nuai nga chuang zet chuan an rama a luh khap tura phutin online petition an thehlut a, hei vang hian MP-te chuan parliament-ah an sawiho.

British danah chuan online petition siamah, thlawptu mi nuai khat an tlin a, an e-mail address dahte a dik a ni tih finfiah thlap an nih chuan, parliament-ah roreltute'n an sawiho tur tih a ni.

Sawihonaah hian MP tam zawk chuan Trump hi an rama luh khapsak an duh loh thu an sawi a, a thil thlirdan maksak tak a neih chungchanga British mipuite ngaihdan leh an thinrimnate chu a taka a rawn hmachhawn ngei a ngai nia an hriat zawk thu an sawi.

Hei bakah hian an rama luh an khap chuan Trump-a larna a tihzual phah dawn a, US ramchhung kaihhnawiha inrawlh chu an tih tur nia an hriat loh thu an sawi.