Haiti President thlan tur tihbuai an tum

Haiti President thlanna neihah tling tura vote hmuh ngai zat hmu pha an awm lo a, Pathianni hian candidate zinga vote hmu sang pahnihte'n inthlan thawh hnihna an hmachhawn leh dawn.

Mahse eptute chuan inthlanna neih zawh takah thil fel tawk lo a awm nia sawiin, inthlan thawh hnihna neih tur hi tihbuai an tum a, thuneitute chu inthlan hi buatsaih lo turin an phut.

Thawhṭanni khan eptute hian an ram khawpui, Port-au-Prince-ah lungawi lohna an lantir a, electoral office eng emaw zat an hal. Khawpui chhunga petrol station-te chu lungin an tawng a, motor pawh an hal bawk a ni.

Haiti President thlan thawh khatna hi nikum October thla khan neih a ni a, hetah hian tling tura inbeisei eptu pawl candidate, Jude Celestin chu vote hmu sang pahnihna niin, rorellai candidate Jovenel Moise a hneh lo a ni.

Mahse Moise pawh hian president tling tura vote hmuh ngai zat a hmuh phak loh avangin inthlan thawh hnihna hi buatsaih a ngai ta a ni.

Jude Celestin chuan inthlan thawh khatnaah sorkar thiltih dan a dik tawk lo tih sawiin, inhnuhdawh a tum thu a sawi.

"Mipuite vote thlak ang ni loin, an duh ang thlan chhuah an tum zawk a ni," tiin sorkar chu a puh.

President candidate 54 zinga a tam zawk pawhin sorkar chu inthlan result thlak danglamah an puh.

Mipui lungawi lo pungkhawmte chuan inthlan thawh hnihna hi buatsaih lo a, sorkar lailawk din tir a, February thlaa President Michel Martelly term a tawp hunah inthlanpui buatsaih ṭha leh zawk turin an phut.

Mahse election thuneitute chuan eptute'n lungawi lohna lantira tharum thawhna an thlen chu an dem thu sawiin, Pathianni-a inthlan thawh hnihna neih tur chu kaltlangpui a nih tur thu an sawi.