Myanmar army-in MP tur a ruat

Myanmar parliament seat-a 25% changtu, Myanmar sipai chuan parliament member turte a ruat.

MP thar turte hi Myanmar sipai hotu lu ber, Min Aung Hlaing chuan a officer rualte aṭangin a thlangchhuak.

Nikum November 8-a inthlanpui neihah khan Aung San Suu Kyi-i party, National League for Democracy (NLD) chu hneh taka thlan tlin a ni. Mahse kum 49 chhung zel ro lo rel tawh, sipaite hian Parliament-ah pawh thuneihna sang tak a la nei dawn a ni.

Sipai pual hian national leh regional parliament-ah seat 25% dah a nih bakah, ministry pawimawh pathum- defence, border affiars leh home affairs-te pawh an chan tura dah sa a ni bawk.

Myanmar sipai hotuin parliament member thar tur atan a officer a ruatte hi election commission chuan a pawmpui tawh.

Army aṭanga MP atana ruat tharte leh, nikum inthlanpuia thlan tlinte chuan February 1 hian session hmasa ber an nei ang. March thla hian NLD kaihhruai srkar kutah thuneihna hi hlan a ni ang.

Sipaite hian Parliament in hnihah MP 166 a nei dawn a, state leh regional assembly-ah member 220 a nei dawn bawk.

Sipai hian member a neih ngah avangin, kum 2008-a sipai sorkar laia ram danpui an siam, ramdang mi laka fa neite an ram president atana dah khapna pawh sorkar tharin thlak danglam a tumna chu an la dang thei dawn a ni.

Sipai MP atana ruat tharte hi captain aṭanga major general te an ni a, an zingah hian lower house member atana ruat zingah Major General Tauk Tun a upa ber a, upper house-ah Major General Than Soe a upa ber a ni.