Sept 28-ah Biden-a impeachment inquiry hearing nei dawn

Republican chakna, US House of Representative chuan president Joe Biden-a impeachment inquiry hearing hmasa ber chu September 28 hian neih a tum.

President Biden hi an chhungkaw business kalpui danah thil fel tawk lo awma puhin, President a nihna aṭanga paihthlak tumin Republican member-te chuan impeachment inquiry an nei a ni.

House Oversight Committee thupuangtuin a sawi danin, September 28-a hearing neih turah hian, Biden-a fapa Hunter-a'n a pa US vice president a nih laia ram pawna sumdawnna a kalpuinaah Biden-a inhnamhnawihna a awm leh awm loh chungchanga constitutional leh legal kaihhnawih zawhna zawh a ni ang. Republican-te chuan Vice President a nih laia Biden-a chet dan aṭangin a eiru ngei tih a lang chiang tiin an puh.

Committee chuan Hunter Biden leh President unaupa, James Biden-a mimal leh sumdawnna bank record zawng zawng dil chhuahna tur 'subpoena' file an tum mek bawk.

White House chuan nakkum inthlan neih tur atana Presidential campaign kalpui mek laia Republican member-te chet dan chu politics khelh dan chhe ber tia sawiin, "House Republican-te chuan thla kaw chhung President hi an chhui tawh a, engmah thil dik lo hailan tur an hmu zo lo," tiin White House thupuangtu Ian Sams chuan a thuchhuahah a tarlang.

House speaker Kevin McCarthy chuan Republicans-te hnen aṭanga Biden-a chunga action la tura nawrna nasa tak a dawn hnuah, kar liam ta khan House-a vote la loin impeachment inquiry neih tur hi a puang a ni.

House member ṭhenkhatte erawh chuan Biden-a laka evidence awm chuan Constitution ina "high crimes leh misdemeanours" tling zo tura a phut pawh a ni pha lo tiin impeachment inquiry neih tum chu an sawisel thung.