Poland-in Ukraine raltlante chhawmdawlna tihtawp tum

Poland chuan Ukraine raltlan maktaduai khat chuangte hnena sum fai ṭanpuina a pek ṭhin chu tihtawp a tum.

Ukraine leh Russia indonaah Poland hi Ukraine ram thlawptu rinawm tak niin, sum leh ralthluamah nasa takin Ukraine hi a puih ṭhin bakah, khawthlang lam aṭanga Ukraine ram mamawh chawkluhna kawng pawimawh tak a ni. Mahse tun hnaiah Ukraine tharchhuah grain lak luh a khap chuan ram ṭhenawm pahnihte inlaichinnaah khi a siam chho a ni.

Sorkar thupuangtu chuan, Ukriane raltlante an chhawmdawlna ṭhin - inbenbel phalna, hnathawh phalna, sikul kai phalna, damdawi inenkawlna leh chhungkuaa khawsa raltlante hamṭhatna a pek ṭhin chu nakkum 2024-ah chuan pek chhunzawm a nih tawh loh tur a sawi.

Poland hi October 15-ah an inthlang dawn a, hei vang hian sorkar chuan Polish loneitute vote beiseiin, EU-in Ukraine tharchhuah grain lak luh chungchanga khuahkhirhna a siam chu a tihtawp hnuah pawh grain lak luh chu an la khap chhunzawm a ni. Hei vang hian ram pahnihte inkarah boruak ṭha lo a awm sa tawh a, Poland-in Ukraine raltlante chhawmdawlna tihtawp a tum leh leh zel hian an inkar boruak a tihchhiat belh ngei a rinawm. Ukraine chuan Poland-in khapna dan an siam ṭhar chu WTO-ah a khing let mek a ni.

Russia lawngin Black Sea-ah Ukraine lawng veivahna an dan chah avangin, Ukraine chuan loh theih lohin an ram tharchhuahte chu khawmual lamah a thawn a ngai tawh a ni.