Journalist-te Libya-a tuilenna hmun chhuahsan turin ngen

Libya khawchhak lam tuilianin chhiatna nasa tak a thlenna, Derna khawpuia journalist tam tak awmte chuan chhanchhuah hna thawhna an dal nia sawiin,thuneitute chuan journalist-te chu Derna khua chhuahsan turin an ngen.

Eastern Libyan civil aviation minister Hichem Abu Chkiouat chuan, "Chhanchhuahna hna thawktute tan awlsam zawk leh sawt zawka an thawh theih nan he thil hi ti kan ni," tiin journalist-te Derna chhuahsan tura an ngenna chhan a sawi fiah.

Kar liam ta khan Mediterranean storm Daniel thawkin tui khuah (dam) pahnih a tichhia a, hei vang hian Derna khuaah nasa takin tui a len phah a ni. Thawhṭanni khan Libya mipui tam tak chu chhiatna thleng chungchangah lungawih lohna lantirin central Derna-ah an kal khawm a, thil thleng chhui chiang thuai tur leh a rang thei ang bera an khua chu din ṭha leh turin sorkar an phut.

Derna-a chhiatna thlengah hian politician-te puhna ri a ring hle a ni. Kum 1970 chhoa siam, dam pahnih chhiat dan chungchang pawh public prosecutor-te chuan an chhui chiang dawn a ni. Derna khaw mipuite chuan chhawmdawl hna thawk tura lut, international team lutte thawhhona a chhiat thu leh chhawmdawlna pek chhuah a rualkhai loh thu an sawi bawk.

Libya Red Crescent chuan kar liam ta khan tuilianin chhiatna a thlena thi zat hi mi 11,300 vel tlingin, chin hriat lohin mi 10,000 an awm mek bawk niin a sawi. Mahse a hnuah UN Office for the Coordination of Humanitarian Affairs chuan thi zat hi 4,000 vel leh, chin hriat loha awm mek hi mi 9,000 niin a sawi ve leh thung a ni.