Iran Parliament-in 'hijab bill' an pawm

Iran parliament chuan Nilaini khan Iran ram mipui, a bikin hmeichhiate tana inthuam dan tur, 'dress code' siam zawm lote hremna tur bill thar - 'hijab and chastity' bill chu a pawm.

Vote laknaah Parliament member zinga mi 152-in bill thar hi thlawpin, mi 34 in an duh lo a, mi pasarih an hai thung. 'Hijab and chastity' bill hi kum thum chhung enchhin phawt tura tih a ni.

Dan lama mi thiamte leh sakhaw hotute awmna, The Guardian Council-in bill hi an pawm ve leh hnuah hman ṭan theih a ni ang.

Hijab bill hi hman a nih theihna turin dan siamtute chuan thla tam tak an buaipui tawh a, Parliament member 10 awmna special committee chuan thla hmasa khan a pawm tawh a ni. Nilainia Parliament-in a vote chu bill thar hman hun chhung tur relna chauh a ni tawh a ni.

Hijab bill chuan, Iran ram mipui, a bikin hmeichhiate inthuam dan tur dress code kum 1979 revolution hnua hman ṭan tawh chu, fir zawka zawm a nih theih nan sawi fiahna thar a siam. Hijab bill version tharah hian, hmeichhiate tana taksa khuh bo dan dik lo awmzia chu "taksa lang tam thawmhnaw emaw tight lutuk emaw, nghawng chin hnuai lang emaw, ke artui aia sang lang emaw, kiu chin chung lam lang emaw"tiin a hrilh fiah a ni. Mipa tan chuan "taksa lang tam thawmhnaw, awm chin hnuai lam leh ke artui chin chung lam tilang emaw dar tilang emaw" tiin hrilh fiah a ni bawk.

Bill hian taksa khuh bo dan tur zawm lote tana hremna thar a tarlang bawk. Dan zawm lote chu pawisa tam tham tak chawitir theih niin, ram dang sorkar, network, media, pawl leh organisation-te nena thawkho an nih phei chuan jail tantir thlengin hrem theih an ni ang.

Sorkar, dan kengkawhtute leh sipal pawlte pawh anmahni leh an hnathawkte chuan hijab rules hi an zawm ngei ngei tur a ni, tiin bill chuan a tarlang.