Saudi leh Israel inlaichinnain ṭhat lam a pan : MbS

Saudi Arabia Crown Prince Mohammed bin Salman (MbS) chuan an ram leh Israel inkar boruak chuan ziaawm lam a pan tih Fox News-in an kawmnaah a sawi a, "Iran-in nuclear ralthuam a neih chuan, keini pawhin kan nei ve ang," a ti bawk.

Isreal leh Saudi Arabia inkara boruak ṭha lo awm reng ṭhin siam ṭhatna tur chu nitinin an hnaih zel tih Crown Prince chuan a sawi a ni. Hemi rual hian Palestinian chungchang chu an tan a pawimawh a, chinfel vat a ngai a ni tiin, hemi chungchangah hian Israel nen pawh inremna pawh an siam theih thuai a beisei thu a sawi. "Tun thlengin boruak ṭha tak hnuaiah kan indawr a ni," a ti.

MbS chuan Saudi Arabia leh Israel khingpui inṭawm Iran chuan nuclear ralthuam a neih a hlauhthawn thu pawh a sawi a, "Chet dan ṭha lo tak a ni. In hmang a nih chuan, khawvel pumpuiin a do let ang che u," tiin Iran chu a vau bawk a ni.