Firfiakten Pakistan university an bei

Pakistan khawpui, Islamabad aṭanga kilometre 140 vela hla, Charsadda-a Bacha Khan University chu nimin zing khan firfiakte'n luhkhungin an bei a, mi 19 an thi a, mi 50 in hliam an tuar.

Bacha Khan University-ah hian zirlai inziaklut 3,000 chuang an awm a, hei bakah hian nimin bik khan Pashtun activist Abdul Ghaffar Bacha Khan thih cham puala poetry recital hun an hman avangin tlawhtu mi 600 vel an awm bawk. Police-te chuan pawikhawihtute hi university chhungah lutin, an silai an pawng kah niin an sawi.

University beih a nih tih hriat a nih veleh police unit leh sipaite tirh nghal an ni a, pawikhawihtute hi bei letin darkar thum zet an inkah hnuah firfiak pali chu an kaphlum niin police-te chuan an sawi.An inkah zawh hnuah pawh campus chhungah hian pawikhawihtu zinga mi an la awm em tih uluk taka enfiah nghal a ni. University bul hi ram ruak zau tak a ni a, heta aṭang hian firfiakte hi university hnunglama guest house awmna lamah an kal a, bangah lawn liamin campus hi an luhkhung a ni.

Express Tribune chuan Tehreek-e-Taliban Pakistan (TTP)-in university beitu an nih thu a sawi tiin a tarlang. Pakistan Prime Minister Nawaz Sharif-a chuan pawikhawihna tenawm tak thleng chu a dem thu a sawi a, "Pawisawilo civil mi leh zirlaite thattu chuan sakhua a nei lo a ni," tiin, an thihna chu a thlawn mai dawn lo tih a sawi.
Thawhlehni khan Pakistan hmarthlang lama Jamrud biala police checkpoint bulah thihchilh bomb tihpuah a ni bawk a, mi 10 thiin, mi 20 chuangin hliam an tuar a ni. Kum 2014 December thla khan Peshawar-a Army Public School chu firfiakte'n ralthuam nen beiin mi 114 an that a, an zinga a tam zawk hi zirlai an ni. Ni rei vak lo liamtaah khan firfiakten Peshawar-a school te beih an tum nia hriat a nih vangin school eng emaw zat chu khar an lo ni tawh bawk.