Tuifinriat-ah sangha aiin plastic tam zawk dawn

Kum 2050-ah chuan khawvela tuifinriat hrang hrangah sangha aiin plastic a tam tawh zawk dawn niin World Economic Forum-in Ellen MacArthur Foundation report a tihchhuah a tarlang.

Kum 50 kalta chhung khan ram hrang hrangte'n plastic bag an hmang uar hle a, plastic bag-te hi vawi khat chauh hman a nih hnua paih an ni tlangpui a ni. Plastic hman zinga 5% chauh hi hman nawn leh tura siam an ni a, a dangte hi chu hmun hrang hrangah paih a ni.

Report chuan plastic hman zinga 32% zet chu hman hnuah lakkhawm loa paih darh an ni a, tam tak hi tuifinriatah paih an ni tih a sawi. Hei vang hian tuifinriatah sangha aiin plastic awm zat hi an la tam zawk thuai dawn a ni.

Hei hian tuifinriat lama eizawngtute thlengin a nghawng dawn a, sangha-te pawh ei tlak loha an awm dawn bakah, tui chhunga plastic tam lutuk avangin an chet vel kawngah pawh harsatna siamin an thihphah thei dawn a ni, a ti.