IS-ten Iraq-ah sal atan mi 3,500 an hreng Jihadi John a thih thu an chhuah

Islamic State (IS) firfiak pawl chuan Iraq ramah sal atan mi 3,500 vel an hreng mek a, an zinga a tam zawk hi hmeichhia leh naupang an ni tih United Nations chuan a sawi.

UN report chuan Iraq hmarlam leh Syria ram zau tak thunun mektu, IS hian an mihring puite lakah pawikhawihna rapthlak tak thlengin, a bikin hnam tlem leh tenau zawkte chungah an che nasa hle a ni, a ti. Firfiakte hian Iraq security force leh Kurdish Peshmerga fighter eng emaw zat an that tawh a, civil mi tam tak an rubo bawk.

Kum 2014 January - 2015 October chhung khan Iraq ramah hian firfiakte pawikhawihna thlen avangin civil mi 18,802 an thi tawh a, mi 36,245 in hliam an tuar bawk a ni.

UN Assistance Mission for Iraq leh UN human rights office chuan IS-te'n sal atana an mi hren mek hi mi 3,500 vel an ni tih sawiin, tam tak hi Yazidi hnam an nih thu a sawi.
Iraq-a UN human rights office director, Francesco Motta chuan IS hian hnam leh sakhaw tlem zawkte nuai chimit chu an tum niin a sawi. An mi mante hi rawng takin an tihlum ṭhin a, silaia kaphlum bakah tihhlum nan hian an lu an tansak , motor-a chilhlum, halhlum leh inchhawng sang aṭanga namthlakte an hmang fo a ni. An mi mante an tihhlum lai video eng emaw zat chu internet-ah hmuh theih turin an dahchhuak bawk.

Motta chuan IS hian civil mi an mante chu security force-te nena an inbeihnaa inphenna atan an hmang fo niin a sawi. Naupangte chu ralthuam hman dan zirtir luiin, indo hmunah an hmang a, civilian infrastructure te an bitum fo bawk a ni, a ti.

IS-ten an mi man an tihhlum lai video an tichhuah eng emaw zata anmahni tihlumtu, hmaituama lo lang ṭhin, 'Jihadi John' tia sawi chu a thi tawh tih an pawl chuan an sawi. Jihadi John hi chhui chian anih hnuah, US sipai chuan, Kuwait-a piang, British khua leh tui nihna nei, Mohammed Emwazi nia hriat a nih thu a lo sawi tawh a ni.

Jihadi John hi nikum November thlaa drone hmanga Syria hmarlam beih a nih ṭum khan a thi niin IS chuan a sawi. Thawhlehni-a IS official newspaper, Dabiq chhuakah an pawl chuan Jihadi John thih thu hi an sawichiang a ni. A hming tak chu Abu Muharib al-Muhajir a nih thu leh, Kuwait rama piang niin a nu chu Yemen hnam a nih thu a sawi. Naupangte a nih laiin an chhungkua hi London, England-ah an pem a, mahse London-a an khawsak dan chu a duh lo a, firfiak pawl hi an zawm ta a ni, a ti.