Pakistan university beihnaa thite sunna hmang

Pakistan chuan nimin khan Bacha Khan University beihnaa thi, mi 21-te sunna hun a hmang.

Ram pumah hnam puanzar a ngul chanve-a zar a ni a, Islamabad-ah mitthi te puala ṭawngṭaina hun hman a ni bawk.

Nilaini khan firfiak pali-in Pakistan hmarthlang lam, Khyber-Pakhtunkhwa province-a Bacha Khan University chu silai nen luhkhungin, zirlai leh zirtirtute chu grenade leh silai hmangin an bei a ni.

Firfiakte hian mi 21 an kap≠hlum a, anmahni pawh hi security force-te'n an kaphlum ve nghal bawk. Mi 21 an thih bakah mi dang 50 chaungin hliam an tuar.

Thi zingah hian zirlaite hum tuma a pistol nena firfiakte lo bei lettu, assistant chemistry professor Syed Hamid Hussain pawh a tel.

University beihnaa thi zinga a tam zawk hi Nilaini vek khan vui nghal an ni.

Khawvel ram hrang hrangin rawng taka university zirlai leh zirtirtute beih an ni chu an dem thu an sawi a, United Nations Secretary General Ban Ki-moon pawhin pawikhawihtute chu an phu ang hremna pek ngei an nih a duh thu a sawi. Pakistan Taliban, Tehreek-e-Taliban Pakistan (TTP) chuan university beitu an ni tih an inchhal tawh a ni.

Ban Ki-moon chuan mitinin lehkha zir tura dikna chanvo an neih chu humhalh tlat a ni tur a ni tiin, zirlai, zirtirtu leh zirna in beih a ni ṭhin chu eng kawng maha pawmzam theih a ni lo, a ti.

School leh zirna hmun hrang hrangte chu zah a ni tur a ni, a ti.

US State department pawhin zirna in beih a ni chu a dem thu sawiin, "Firfiakte'n zirna in bei a, Pakistan-in a la hmachhuan tur, zirlai ṭha tak takte an bei fo hi thil pawi tak a ni," a ti.

Switzerland-a Davos forum hmanga cham mek, Pakistan Prime Minister Nawaz Sharif-a chuan university beih a chu a dem thu sawiin, thil awmdan pawh uluk taka a zirchian thu a sawi.

"Kan ram tana an inpeknate hi a thlawnin a luangral dawn lo. Pakistan ram pum hi firfiaka chetna dodal turin kan inlungrual a ni," tiin a sawi.