Russia beihpui thlakah Syria civil mi 1,000 chuang an thi

Syrian Observatory for Human Rights (SOHR) chuan kum 2015, September thla aṭanga Russia-in Syria rama beihpui a thlaknaah civil mi 1,000 chuang an thi tawh tih a sawi.

SOHR chuan civil mi thi hi an chhinchhiah chinah mi 1,015 an ni a, nau≠pang 238 an tel niin a sawi.

Observatory chuan Russia kutah hian hel 1,141 an thi bawk a, Islamic State (IS) firfiak pawl mi leh sate pawh an tel tih a tarlang bawk.

Hetihlai hian kum 2011 April thla aṭanga Syria tualchhung buaina thleng chungchang lo zirchiangtu, non-governmental organistion Violations Documetation Centre (VDC) chuan Russia beihpui thlaknaa thi zat hi mi 1,505 an tling tih a sawi thung. Thite hming pawh an chhinchhiah vek thu leh, an zingah naupang 346 an tel thu a sawi. Russia beihna avanga thi zingah hian hel 47 chauh an tel a ni, a ti.

Syria Civil Defence volunteer, Khaled Ashawi chuan Russia-in nikum Setember 30 aṭanga Syria rama thlawhtheihna hmanga beihpui a thlak
ṭan aṭang khan civil mite a bitum fo niin a sawi.

Khaled chuan, "Russia in beihpui a thlak dawn tih radio-a puan a nih aṭang khan ramdangte nena an chetdan a inang dawn lo tih kan hrethiam nghal a ni. Talbieseh-a thingtlang khaw pakhat chu an bomb chhe vek a, civil mi chenna in 60 pawh an tihchhiatsak nghal a ni," a ti.

Russia chuan Syria rama beihpui a thlak chu Syria President Bashar al-Assad-a ngenna vang a ni tih thu leh, Islamic State (IS) firfiak pawl leh al-Nusra helpawlte chu an bitum thu a sawi.

Beihpui thlakna atan hian indo thlawhtheihna leh helicopter 69 a hmang. Mahse Russia hi Bashar-a thlawptu a nih avangin beihpui a thlakah hian firfiakte aia Syria sorkar dodaltu helte bitum zawkah puh a lo ni fo tawh a ni.

United Nations chuan Syria tualchhung buaina thleng avanga thi hi mi 250,000 an tling tawh niin a sawi a, mi maktaduai tel chu ramchhung hmundang leh rampawnahte himna zawngin an tlanchhe tawh bawk.