US Senate-in Syria refugee bill a dang
US Senate-a Democrats member-te chuan Syria leh Iraq aṭanga US-a raltlan lut turte tikhawtlaina tur bill siam chu an dang.
Republican member-ten an thlawp, refugee bill chungchanga vote laknaah hian a thlawptu lamah vote 43 a tlak laiin, a duh lotu Democrats lamin vote 55 an nei thei thung a ni. Democrats zingah bill thlawptu hi member pahnih an awm a ni.
He bill hi pass a nih chuan Iraq leh Syria aṭanga US-a raltlan luh tumte tan a harsa tawh dawn a, high level official-te chuan raltlan luh dilte chu US-a an luh hmain an ram himna atana an hlauhthawnawm em tih an enfiah vek phawt a ngai dawn a ni.
Republican lam chuan raltlan luh tumte tana endikna khirh zawk siam hi America mipuite himna atan leh, Islamic State (IS) leh firfiak pawl dangte'n an ram an beih mai theih tur venna atana thil pawimawh a ni, a ti.
Mahse Democrats lam chuan he dan siam hi indona hlaua tlanchhia mipuite beihna chi khat niin a sawi ve thung.