Beirut-a chhiatna thleng vangin Lebanon sorkarin banna thehlut
Lebanon khawpui, Beirut-a August 4 zana chhiatna rapthlak tak thleng chungchangah sorkar laka lungawi lohna lan tira hun eng emaw chen mipuiten nawrh an huaihawt hnuin, Thawhṭanni zan khan prime minister Hassan Diab chuan a kaihhruai sorkarin banna a thehlut tih a puang.
Beirut-a chhiatna thlen hnu hian sorkar chu mipui himna tur ngaihthah leh eiruknaa inhnamhnawih nasaa puhin, mi tam takin lungawi lohna an lantir a, nawrh huaihawtnaah pawh police-te nen innawr buaiin hliam tuarte an awm nual a ni.
Kumin January thlaa prime minister atana ruat, Hassan Diab chuan banna thehluh a nih thu hi TV-ah puangin, a kaihhruai sorkar chuan an ram tan theihtawp a chhuah a, mahse an ramah eirukna chuan bu a khuar nasa tawh lutuk a, ram tana danglamna thlen tura an beihna chu kawng hrang hrangin dan chah an ni ṭhin niin a sawi. Diab chuan mipuite duhdan zawmin, chhiatna thlengah mawhphurhna an la tih a sawi bawk.
PM-in banna a thehluh hma hian cabinet minister pathum leh Parliament member pasarih chu an lo bang tawh a ni. President Michel Aoun chuan PM in banna a thehluh chu a pawmsak nghal a, mahse cabinet thar a din hma chuan sorkar enkawl hna thawk chhunzawm rih turin a ngen.
Beirut mayor Marwan Abboud chuan chhiatna thleng vanga thi chu mi 220 an tling tawh a, chin hriat lohin mi 110 an la awm mek tih a sawi. Chin hriat loha awm zingah hian ramdang mi hnathawka awm leh, lorry driver eng emaw zat an tel.