Israel-in Palestinian-te in nawr chhiatsak
Israel chuan West Bank-a E1 biala Palestinian mite in a nawr chhiatsak.
Israel sipaite chuan Ningani khan Jabal al-Baba khuas in pali-a chengte chu chhuah tirin, an in hi bulldozer hmangin an nawr chhiatsak nghal tiin tualchhung mite chuan an sawi.
West Bank-a E1 bial chhungah hian Palestinian Bedouin thingtlang khaw 20 chuang a awm a, heng zingah hian Jabal al-Baba pawh hi a tel. He khuaah hian mi 300 vel an cheng a, a ṭhenawm Abu Nuwwar-ah mi 700 vel an cheng bawk.
January 5 khan Abu Nuwwar-a in panga chu Israel sipaite'n an lo nawr chhiatsak tawh a, mi 25 chenna nei loin an awm phah a ni.
Israel sorkar chuan a ram luah china Palestinian thingtlang khuate chu sawnchhuah a, Judate chenna hmun sak a tum.
Sorkarin sawnchhuahna tur ruahmanna a siamah chuan, Palestinian thingtlang khaw hrang hranga chengte chu an khaw bul hnaia khawpui lian zawkah sawn khawm a, an mamawh ang electricity leh tui te pawh pek a tum a ni.
United Nations for the Coordination of Humanitarian Affairs chuan East Jerusalem-a a ram luah china cheng, Palestinian mi 90,000 vel chu sawnchhuah theih mai dinhmunah an ding mek tiin a tarlang.
Palestinian-te chuan Israel sorkarin thingtlang khuate sawnchhuah a tumna hi an dodal a, sorkar ruahmanna siam chu an dikna chanvo palzut sakna leh, an duh thu anga an chetvel leh thil dang an tihna tur dansakna a ni, an ti.
Hetihlai hian Israel organisation, Bimkom chuan Israel thuneitute hian E1 biala chengte chu hun eng emaw chen insawnchhuak turin a lo nawr tawh a, hriattirna pawh vawi eng emaw zat an pe niin a sawi.
Kum 2009-2014 inkar khan West Bank-a Juda-te chenna tur hmun siam chu 23% zetin a pung a, West Bank leh East Jerusalem-a hmun 150 chuangah Juda mi nuai nga vel an cheng tawh a ni.
Ramdangte nawrna avangin kum 2013 khan Prime Minister Benjamin Netanyahu chuan E1-a Juda-te chenna in sak belhna tur ruahmanna chu a lo titawp tawh a, mahse Israel Ministry of Housing-in West Bank-a in 55,548 sak thar a tum zingah E1 bialah hian in 8,372 sak tel a tum.