Vur thli tleh dawn vangin emergency an puang

US khawchhak lam bialah vur thli na tak a tleh dawn vangin Ningani aṭang khan Washington DC leh state dang panga-ah emergency puan a ni.

Kartawpa vur thli tleh tur hi a na hle dawn nia sawi a ni a, vur pawh feet 2 vela chhah a tlak rin a ni bawk.

Washington DC, Tenne-ssee, North Carolina, Virginia, Maryland leh Pennsylvania thuneitute chuan state of emer-gency hi puangin, Natio-nal Weather Service pawhin hriattirna a tichhuak bawk.

Weather service chuan Zirtawpni tlai lam aṭanga Inrinni zan thlengin vur thli na tak a tleh dawn a, hemi atana lo inbuatsaih lawk turin a ti.

Mipuite pawhin mamawh hrang hrangte an lakkhawl a, Washington Metropolitan Area Transit Authority pawhin khawpui chhunga Metro system chu Zirtawpni zan aṭanga Pathianni thleng a khar tur thu a sawi.

Airlines lian te pawhin US khawchhak lam biala an service-te an cancel a, nimin khan flight 2,000 chuang cancel a ni a, vawiin hian 3,000 chuang cancel a ni bawk ang.

China ramah pawh vur thli tleh vangin province 12-ah nimin khan kawngpui leh airport-te khar a ni.

China khawchhak lama Jiangxi province-ah chuan nimin khan vur thli na tak a tleh a, kum 1992 hnuah an province a vawh ber ṭum a ni bawk. Beijing-ah pawh nimin khan khaw vawh lam -10ºC a ni a, vawiin hian -17ºC a tlin rin a ni bawk.