Russia-in Britain report a pawm lo

Russia chuan Britain-in kum sawm liam taa enthlatua a puh, Alexander Litvinenko thah a nih dan chhuitu, inquirty commission report chu a pawm lo a, a thil chhuichhuah dan chu thil nuihzatthlak tak a ni, a ti.

Kum 2006 khan kum 43 mi, enthlatu Alexander Litvinenko chu London-a hotel-a a thingpui inah radioative polonium pawlhsak a nih avangin a hnu kar thumah a thi a ni. Britain chuan Litvinenko tihhlum hi hetihlaia FSB spy agency director, Nikolai Patrushev bakah Russia President Vladimir Putin pawhin an pawmpui niin a sawi.

British police-te chuan Russia mi pahnih, Andrei Lugovoi leh Dmitri Kovtum-te chu Litvinenko thingpui in tura tûr pawlhsaktuah an puh a, Russia security service-te tih tir niin an sawi bawk. Mahse Lugovoi chuan British police-te puhna hi thu dik lo a nih thu a sawi thung.

Vladimir Putin-a thupuangtu, Dmitry Peskov chuan Britain thil chhui chhuah dan chu an pawm loh thu sawiin, "He thil hi fiamthu mai a ni. British fiamthu thawh dan pawh a ang zawk a ni," a ti.

Lugovoi pawhin thutlukna siam-tu judge chu a â ta nia a lan hial zawk thu a sawi bawk. Ninga-ni-a London High Court-in a thutlukna a chhiarchhuah lai hian Litvinenko-a nupui, Marina leh a fapa bakah anmahni thlawptu mi eng emaw zat chuan court thutluk-na chu lawmawm an tih thu an sawi.

Marina-i hian hun rei tak chhung a pasal thih danah public inquiry nei tur leh, Putin-a laka hrekna lekkawh turin a lo phut tawh a ni.

Inquiry chairman, Judge Robert Owen chuan Litvinenko-a thingpui ina polonium-210 telhtu hi Lugovoi leh Kovtun-te an ni ngei tih a sawi.

Polonium-210 hi radioactive isotope niin a vang hle a, nuclear siamna hmunah chauh hmuh tur a awm. Owen chuan heng mi pahnihte hian Litvinenko hi an mimal inhuatna lam ni loin, FSB thupek angin an tihlum a ni, a ti.

FSB hi Soviet Union hunlaia KGB spy agency thlaktu a ni. Litvinenko hi FSB leh KGB agent hlui a ni a, freelance inves-tigator-ah inletin, British intelli-gence tan pawh a thawk bawk.

Russia President Putin chu vantlang hriatah nasa taka a sawisel fo avangin FSB phatsan-tuah puh a ni. Litvinenko hian November 23, 2006-a a thih hma pawh khan Putin chu amah that tura thupek tichhuakah a lo puh tawh bawk.