Israel-in Gaza Strip ramri khar
Israel chuan Gaza Strip aṭanga Palestinian-te balloon alh chhuah vanga, Israel ram china kangmei a chhuah avangin nimin aṭang khan Gaza Strip ramri a khar.
Israel media-te chuan Gaza aṭanga balloon an chhuah hmang hian Israel ramri bula hmun 30 chuangah kangmei a chhuak tih an sawi. Defence ministry chuan thuchhuah siamin, Kerem Shalom crossing chu khar a ni a, hei hian bungraw phurte pawh a huam vek dawn tih a sawi. Mahse fuel leh mipui nitin mamawh zual phurtu erawh chu an kal phalsak an ni thung.
Kerem Shalom hi Israel leh Egypt aṭanga Gaza luhna pui ber zingah a tel a, Gaza Strip-a bungraw phurh luh tam zawkten he crossing hi an hmang a ni. Ramri kanna pui ber pakhat khar a nih avangin Gaza Strip-a hnathawh lai eng emaw zat, a bikin in sak hna thawh laite chu a nghawng dawn hle niin Palestinian official-te chuan an sawi. Gaza Strip hi Palestian pawl, Hamas-te rorelna a ni a, khawthlang ramte chuan Hamsa-te hi firfiak pawlah an puang a ni.