Thailand-a zirlaiten nawrh huaihawt

Thailand-a zirlai 4,000 vel chuan Bangkok-a Thammasat University-ah sorkar laka lungawi lohna lantirin nawrh an huaihawt. Zirlaite hian an rama democracy tundin an duhna thute au puiin, prime minister Prayuth Chan-ocha chu bang turin an phut. 

Zirlaite hian rama sipai thlawp sorkar chu duh loin, democracy tundin an duh a, an ram lal thuneihna tihtlem an duh bawk a ni. Zirlai nawrh huaihawt zinga pawl ṭhenkhatte chuan an ram danpui (constitution) chu September thla hmaa ziak ṭha turin sorkar an phut ve bawk. A hma pawhin nawrh hi an lo huaihawt tawh a, hruai­tu ṭhenkhatte chu  man an lo ni tawh a ni.  

Thailand hi lal rorelna, monarchy hnuaia awm niin lal leh lal chhungkua sawisel leh zahpah loa awmte chu kum 15 thleng lung in tan tir theih an ni. Zirlaite hian monarchy system hnuaiah mipuite zalena rahbet sak a ni fo nia sawiin, an ram inrelbawl dan hi thlak an duh a ni. Hetih lai hian Parlia­ment kawtah sorkar lam thlawptuten an pung khawm ve bawk a, an ram lal leh sorkar an thlawpna an lo lantir ve thung.