Zalenskyy-a'n Ukraine thlawp turin Canada ngen

Ukraine president Volodymyr Zelenskyy chuan Washington-a US president Joe Biden leh US lawmaker-te a hmuh hnuah, Ningani khan Canada-ah a thleng tih Canada prime minister Justin Trudeau-a office chuan a sawi.

Zelenskyy hian nimin khan Canada Parliament-ah thu sawiin, Russia nena an indo meknaah khawthlang lam ramte chu Ukraine thlawp turin a ngen.

Tun ṭum hi Zelenskyy-a'n nikum February 2022-a Russia-in Ukraine a run hnua Canada a tlawh lehna hmasa ber a ni. Indona chhuah hnuah hian ṭum khat chu virtual-in Canada Parliament-ah hian thu a lo sawi tawh bawk.

Canada-ah hian Ukrainian mi maktaduai 1.4 zet an khawsa a,a rampum mipui zat 4% an tling ṭep a ni. Zelenskyy hian Toronto-a Ukraine mi awmte hi a hmu dawn a, Canada PM Trudeau chuan a ṭawiawm ang.

Canada U.N. ambassador Bob Rae chuan Canada-in eng tiang takin nge Ukraine chu a thlawp tih Zelenskyy-a tan hriat a pawimawh thu sawiin,"Nasa takin kan pui tawh a, a aia nasaa puih pawh an la ngai. Ukraine mipuite ṭanpui tur hian theihtawp kan chhuah reng dawn a ni," tiin a sawi. Canada hian Ukraine chu Canadian $ tld 8.9 (US $ tld 6.6) zetin a lo ṭanpui tawh a, industrial nation zinga Ukraine tana ṭanpuina pe hnem berah an inchhal hial.

Russia leh Ukraine inkara indona a chhuah hnuah, Ukraine mi 1,75,000 chuang chu Canada-ah hian an tlanchhe tawh a, mi 7,00,000 hnenah Canada luh phalna pek belh a ni leh tawh bawk. Raltlante hi kum thum chhung hna thawh phalna pek niin, Canada khua leh tui nia awm hlen theih dan tur pawh sorkar chuan a ngaihtuah mek bawk.