Nakkum January-ah Pakistan inthlang dawn

Pakistan poll panel chuan nakkum January chawlhkar tawpah an ram inthlanpui neih a nih tur thu Ningani khan a puang.

Election Commission of Pakistan (ECP) chuan thuchhuah siamin, kumin November-a inthlan tur chu constituency siam ṭhat a nih avanga tihkhawtlai a nih thu a tarlang.

Poll panel chuan constituency tharte final list hi November 30-ah tihchhuah a nih tur thu sawiin, nomimation file, appeal leh campaign-na hun atana ni 54 dah a nih hnuah, January thla tawpah vote thlak a nih tur thu a sawi.

Mihring maktaduai 241 chenna Pakistan ramah hian August thla khan sorkar kum nga term hman lai mek chu a tawp tawh a, tunah hian Pakistan chu caretaker government-in a enkawl mek.

Pakistan constitution ang chuan, sorkar term hman zawh aṭanga ni 60 chhungin emaw, sorkar term pawh tawi a nih chuan ni 90 chhungin emaw inthlan hi huaihawt tur a ni.

Mahse sorkar kalchhuak tur term a tawp hma lawk hian, prime minister Shehbaz Sharif chuan census thar ber chu pawmin, constituency siam ṭhat a remti a ni.

Nikum April thla khan Imran Khan chu Parliament-ah no confidence vote-ah chak loin Prime Minister a nihna aṭangin paihthlak a ni a, hemi hnuah hian Khan leh a party Tehreek-e-Insaf (PTI) chuan inthlanpui buatsaih thuai turin sorkar hi an nawr zui reng a ni.