Paris airport-ah zawng lu ruh 400 an man

France khawpui, Paris-a Charles de Gaulle Airport custom official-te chuan thla sarih chhungin zawng lu ruh 400 dawn an man tih an sawi. Zawng lu ruh an mante hi thah phal loh, humhalh lai species an ni.

Paris-a airport lian bera custom agent-te chuan May-December 2022 chhungin zawng lu ruh awmna package 392 an man tih Ningani khan an sawi. Zawng lu ruhte hi a tlangpuiin Cameroon aṭanga lo kal niin, United States a thawn tur an ni.

Hei bakah hian lu ruh leh ruhro awmna package 100 chuang an man tel bawk. Heng an thil manah hian, species venhimte hralh phalna document engmah a tel lo tih custom agent-te chuan an sawi.

Airport customs chief Gilbert Beltran chuan ramsa humhalh lu ruh, ruhro leh ngho an mante chu pholangin, ramsa thah phal lohte tawlhruk hi ruihhlo, ralthuam leh mihring tawlhruk tluk zetin a hluar a, he sumdawnnaah hian kum tin euro tld 8 - 20 inkar sum che vel a awm ṭhin tih a sawi bawk.

Zawng lu ruhte hi US-a collector leh hunting club-te lawmman leh thilpek tur atana tih a nih rin a ni.