Haiti President thlan tur ṭhulh

Haiti ram chuan a ṭum thumna atan President thlan thawh hnihna, nimina neih tur chu a ṭhulh leh.

Electoral Council chair-man, Pierre-Louis Opont chuan security lam venthawn thil avangin inthlan hi ṭhulh a nih thu a sawi.

Nikum November thla khan President thlanna hi neih a ni a, candidate zingah tling tura vote hmuh ngai zat hmu pha an awm loh avangin vote hmu sang pahnihte'n inthlan thawh thihna hi an hmachhawn leh a ngai a ni.

Eptute chuan President thlan thawh khatnaah khan thil dik tawk lo a awm nia sawiin lungawi lohna an lantir a, inthlan thawh hnihna chu an dodal a ni.

Eptu pawl candidate, Jude Celestin pawhin inthlan thawh hnihna hi buatsaih luih a nih dawn chuan a boycott tur thu a lo sawi tawh bawk.

November thlaa inthlan-ah hian rorellai candidate, Novenel Mosie chuan vote hmu sang berin vote tla aṭangin 33% a hmu a, Celestin hian a dawt a ni. Celestin hian Haiti president hi a chuh
ṭum hnihna a ni.

Haiti President Marte-lly chu kar thum hnuah a term a tawp tawh dawn a, amah thlaktu tur hi thlan fel thuai a nih loh chuan Haiti ram dinhmun hi a
ṭhat loh zual hle rin a ni. Kum 2010-a lirghing na takin Haiti rama chhiatna rapthlak a thlen hnuah khan an ram dinhmun hian ngai a la awh thei lo a, ram dangte puihnaah an la innghat lian hle a ni.