Thailand-a thlawhtheihna them MH370 nen sawi zawm

Thailand chhim lam tuipui kamah thlawhtheihna them nia hriat chhar a ni a, hei hi kum hnih liamtaa chin hriat loha bo, Malaysia Airlines thlawhtheihna, Flight MH370 them a ni mai thei nia sawi a ni.

Nakhon Si Thammarat province-a tuipui kamah metal them lian tak hi tuiin a hnawlchhuak a, khawchhung miten thuneitute hnenah hriattirin an enfiah dawn niin Pak Phanang district hotu, Tanyapat Pathhikongpan chuan a sawi.

Patthikongpan chuan, "Tuipui kamah an thil char hi metal, a vang meter hnih leh a dung meter thum-a lian a ni," a ti.

Thai media-te chuan an thil chhar hi MH370 them a nih mai theih thu an sawi.

Kum 2014 March thla khan MH370 hi Kuala Lumpur aṭanga Beijing pana a thlawh laiin chin hriat lohin a awm a, nasa taka zawn ni mah se tun thlengin a awmna chin hi hriat a la ni lo.

He thlawhtheihnaah hian mi 239 an chuang a ni. Thlawhtheihna them nia hriat hi kum 2015 July thla khan France thliarkar pakhata tuipui kamah hmuh a ni a, mahse a dang hmuh belh engmah a awm zui ta lo a ni.

Patthikongpan chuan, "Sangha mantute chuan an thil chhar hi a awmdan aṭangin tuifinriat chhungah hian kum khat chuang zet a awm tawh nia a lan thu an sawi," a ti.