Zika virus vangin Travel warning tichhuak

Zika virus leng avangin Africa leh Oceania-a zin tumte tan travel warning tihchhuah a ni a, warning hian ram 23 a huam tawh a ni.

World Health Organi-zation chuan he natna hri hi ram 20 velah a darh tawh niin a sawi a, Brazil chu a tuar nasa ber zinga mi a ni.

Zika virus hi kum 1940 chhoah khan Africa ramah hmuhchhuah a ni tawh a, tun hnaiah Latin America ramah a darh chak hle a ni. He natna hi thosi chi khat, Aedes aegypti seh aṭanga kai theih a ni a, dengue fever leh yellow fever pawh a thlen thei a ni.

Nu, naupai laiin Zika virus hi a kai chuan a fa chu mi pangngai aiin a lu a te a, a thluak thlengin a khawih pawi thei a ni. Zika vei nausen zinga 49% chuan an thihpui a, a damchhuakte pawh an lu a tet bakah, tawng an harsat a, an ṭuan a fum bawk a ni. Zika virus hian khawsik leh taksa thak a siam a, ṭhenkhatah erawh chuan a lang vek kher lo.

Tun thlengin a tihdamna hi hriat a la ni lo, a invenna awmchhun chu thosi pian theihna tui tlingte tihbo a, thosi seh tur laka inven a ni rih tiin mithiamte chuan an sawi.

Brazil ramah chuan nikum October thla aṭang khan nau piang thar zingah Zika virus vei nia rin, pianphung pangngai aia an lu te mi 4,000 dawn an awm tawh a ni.

Colombia ramah chuan Zika hri vei hi nia hriat mi 13,500 vel an awm tawh a, an ram health ministry chuan he hri laka invenna kawng khat atan hmeichhiate chu thla riat chhung nau pai lo turin a lo ngen tawh a ni.

US Centres for Disease Control and Prevention chuan kar kalta khan nu, naupai laite tan travel warning tichhuakin, Zir-tawpni khan tlawh lo tura a tih zingah ram pariat a dah belh leh a ni.