Portugal President atan Rebelo de Sousa thlang tling

Portugal President thar atan politician hlun leh law professor, Marcelo Rebelo de Sauosa chu thlan tlin a ni.

Pathianni khan Portugal mipuite chuan an President thar tur thlangin vote an thlak a, vote a tla ṭha lo a, 48% vel chauh a tla pha a ni.

President tling tura vote hmuh ngai zat vote tla aṭanga 50% a ni a, centre-right candidate Rebelo de Sousa hian 52.4% a hmu pha a ni. Amah hnaih bertu, independent leftist Antonio Sampaio da Novoa chuan 22.8% chauh a hmu pha thung. Inthlanah hian candidate 10 an awm.

Portugal President atana thlan thar, Rebelo de Sousa hi kum 69 mi a ni a, politics lama tawnhriat ngah tak a ni. March 9 hian President thar atana lakluh niin, Anibal Cavaco Silva a thlak dawn a ni. Mahse an ram danpui hnuaiah, inthlan≠pui buatsaih aṭanga thla ruk a ral hma chuan parliament a ṭhiat thei dawn lo. Nikum October thla khan an ram inthlanpui neih a ni a, Socialist sorkar a ding a ni. Hei vang hian April-ah President thar hian parliament a ṭhiat thei chauh ang.

Inthlan hmaa campaign an neihah, an rama sorkar ngelnghet a din theihna turin a theihtawp chhuah a tiam a, an ramin economy lama harsatna a tawh mekte thawi dam turin a bei dawn tih a sawi. A ngaih pawimawh ber tur chu an ram mipuite inlungrual tlanna leh inpumkhatna siam a ni tih President thlan thar chuan a sawi.