Israel PM hlui Shimon Peres damdawi-inah dah

Israel Prime Minister hlui Shimon Peres-a chu thawkna kawngah harsatna a neih avangin Pathianni khan damdawi-inah dah a ni.

Ni 10 liamtaah khan heart attack a neih avangin Peres hian minor surgery a lo nei tawh bawk.

Kum 92 mi, Peres hi Israel PM ṭum hnih a ni tawh a, kum 2007-2014 thleng khan President hna a chelh leh bawk. Kum 1994 khan Oslo peace accord siamna tura a tha thawh avangin khawvela chawimawina sang, Nobel Peace Prize hlan a ni tawh a, he chawimawina hi Prime Minister Yitzhak Rabin leh Palestinian hruaitu Yasser Arafat-te nen an dawng ho a ni.

Kum 1996 inthlanah khan Likud party hotu, Benjamin Netanyahu a hneh zo lo a ni.

Peres hian Israel politics-a dinhmun pawimawh tak tak a chelh kim deuh thawh a, kum 1959-a Israel nuclear programme siam pawh a duangtu ber a ni. A kum upa tawh mah se vantlang thilah a la inhmang zui hle a, non-governmental Peres Centre for Peace hmangin Israel leh Palestinian-te inzawmna ṭha siam tumin a bei reng a ni.