Syria sipaite'n hel kut aṭangin khawpui la let

Syria sorkar sipaite chuan helho kut aṭangin an ram khawthlang lam, Latakia province-a khawpui pawimawh, Rabia an la let. Rabia hi helho hian kum li kalta khan sipaite kut aṭanga lain an awp zui a ni.

Latakia province hi Syria President Bashar al-Assad-a hnam, Alawite hnam tamna bial a ni.

Rabia khawpui lakletna kawngah hian Syria sipaite chu Russia sipaiten an pui nasa hle niin monitoring group, Syrian Observatory for Human Rights chuan a tarlang.

SOHR hotu, Rami Abdel Rahman chuan Syria sipaite hian khawpui chhehvela thing≠tlang khaw eng emaw zat an lakkir hnuah, he khawpui hi hmun thum aṭanga hualin helho hi an bei niin a sawi. Syria sipaite pui tur hian Russia chuan thlawhtheihna hmangin helho hi a lo bomb bawk a ni.

Syria sipaite chuan Latakia-a helho ram lakte lakkir leh vek tumin an bei mek a, Russia puihna nen hma pawh an sawn chak hle. A ṭhenawm, Idlib province-a helho kuta la awmte pawh lakkir leh tuma beih chhunzawm zel an tum.