IS video tihchhuahah Paris beitute tilang

Islamic State (IS) firfiak pawl chuan video an tichhuak thar a, hetah hian France khawpui Paris beihnaa tel mi pakua-te thlalak a tilang tel. Firfiakten Paris khawpui an beihnaah khan mi 130 in nunna an chan a ni.

IS video tihchhuah hi a dik ngei em tih finfiah theih a ni lo a, Britain ram beih tuma an vauna pawh an tilang tel.

Video hi IS Al-Hayat Media Centre-in an official Telegram channel-a a dah a ni a, hetah hian Paris beih a nih hmaa a beitu turte thlaler hmun pakhata an awm lai tihlan a ni. An zinga ṭhenkhatin an mi mante lu an tansak laite an tilang bawk.

Kum 2015, November 13 zanah khan firfiakte chu hmun thuma inṭhenin, Paris khawpuia sports stadium, cafe leh concert hall-te an bei a ni. He pawikhawinaa inhnamhnawiha rinhlelh, Salah Abdeslam manna tur thupek chu France sorkarin a tichhuak tawh a, ani hi Paris beih a nih tukah Belgium ramah a tlanchhia.

Paris beitu nia sawite hi video-ah an ram hming tihlan a ni a, pathum chu France mi niin, Belgium mi pali leh Iraq mi pahnih an ni. An zinga pahnihte hi Stade de France stadium-a thichilh bomb tipuaktu an nih rin a ni a, Syrian passport lem siam nia hriat an keng a ni.

British Prime Minister David Cameron-a'n pawikhawihna a thlen hnua France mipuite a tawrh≠puina thu a sawi lai pawh tilan tel a ni a, hemi hnu hian screen-ah Britain ram vauna thu hi an ziaklang a ni.

IS chuan Paris beitute chu sakeibaknei, France ṭhingṭhit tirtu tiin a sawi. Paris khawpui beitu zinga pasarih chuan a hmunah hian an thi a, an zinga pahnih chu a hnuah police-te'n an kaphlum leh bawk. Mahse he pawikhawihnaah inhnamhnawih zat tak hi hriatchian theih a la ni lo.

Belgium thuneitute chuan Paris beihnaa inhnamhnawiha rinhlelh mi 10 an man tawh a, mi pali zawn mek an ni bawk.