Poland PM-in Poland pawi sawi tawh lo turin Zelenskyy hrilh

Poland prime minister Mateusz Morawieck chuan Volodymyr Zelenskyy-a'n Poland-in grain thawn chhuah chungchang buaina hmangin lem an chang tia a sawi chu chhang letin, Poland pawi sawi tawh lo turin Ukraine PM chu a vau.

Kar liam taa United Nations-a thu a sawinaah, Zelenskyy chuan Poland-in an buaina nia a sawi chu politics-a lemchanna a nih thu a sawi.

Zirtawpnia Swidnik-a rally neihnaah Morawieck chuan Zelenskyy thusawi chu chhang letin, "Tunhnaia UN-a thu a sawinaah Poland pawi a sawi ang kha vawi khat mah ti leh tawh lo turin President Zelenskyy hi ka hrilh duh a ni," a ti. "Polish mipuite hian hetiang thil a thlen hi kan phal ngai lo ang, Poland hmingṭha vawnhim hi Polish sorkar tihtur pawimawh ber a ni a, ka tihtur a nih bakah, ti theia ka awm hi ka lawm a ni," a ti bawk.

Morawieck thusawi chuan ram pahnihte inkara boruak ṭha lo awm mek chu a tihzualkai a rinawm hle.

Poland hi Russia leh Ukraine indonaa Ukraine thlawptu rinawm tak a ni reng ṭhin a, tunhnaiah Ukraine tharchhuah grain chu Poland-in an rama lak luh a khap chuan ram pahnihte inkar boruak a tichhia a ni. Hemi hma hian Ukraine tharchhuah grain-te chu an man a tlawm avangin tualchhung loneitute'n an tuar ang tiin EU chuan khuahkhirhna an lo siam tawh bawk.

EU chuan kar liam ta khan an khuahkhirhna siam hi a sut a , mahse, Poland, Hungary leh Slovakia ramte chuan khuahkhirhna hi kalpui zel turin thuthlukna an siam thung. Hemi chungchangah hian Ukraine chuan ram pathumte hi a khing mek a ni.