World Bank-in fimkhur turin Pakistan a chah

Pakistan ramah retheihna a pung zel a, fiscal year hnuhnung berah chuan mi rethei 39.4% lai awm tawhin, sum leh paia harsatna nei mi mtd 12.5 zet an awm belh a ni. Hei vang hian World Bank chuan rang taka hma la tur leh ram economy siamṭha turin Pakistan chu a chah.

World Bank-in a tarlan danin, Pakistan ah hian mi rethei awm zat chu 34.2% aṭangin 39.4% ah a pung chho a, mi mtd 12.5 chu below poverty line-ah awm belhin, ni khatah $ 3.65 pawh an thawk chhuak zo lo. Pakistan rama mi rethei awm zat chu mtd 95 an tling tawh a ni.

World Bank-in Pakistan tana economist a ruat Tobias Haque chuan," Tuna Pakistan economic model hian retheihna a tikiam zo tawh lo a, ṭhenawm ramte nena khaikhinin an khawsak a hniam hle a ni," tiin a sawi. Hei vang hian World Bank chuan Pakistan chu hma la tura nawrin, argiculture leh real estate-ah te chhiah la tur leh, inrenchemna kalpui turin thurawn a pe.

Hmasawnna chhe lutuk, sum leh pai dinhmun chhia, sorkar-ina private sector a buaipui lutukte chu sorkar thar lo awm turte chuan ngaihmawh hmasakah nei turin thurawn a pe a, agriculture leh energy sector-te ngai pawimawh turin a ti bawk.

World Bank chuan Pakistan tax-to-GDP ratio chu 5% a tipung turin a ti a, sum hmanna pawh GDP aṭanga 2.7% a titlem turin a ti bawk a ni.