Thailand eptu pawl Move Forward Party-in hotu thar nei

Thailand eptu pawl, Move Forward Party chuan an hotu thar atan Chaithawat Tulathon thlan a ni tih an puang. Tulathon hma hian Pita Limjaroenrat chuan MFP hi kaihruai ṭhinin, May thla inthlanah pawh nasa takin a chakpui a ni.

MFP hotu thlan thar hi environment engineer a ni a, Thailand-a political movement-ah kum nga chuang inhnamhnawih tawhin, MFP lo chhuahna party dintu zinga mi a ni bawk.

MFP chuan kumin inthlanah khan parliament seat tam zawkah hnehna an chang a, an anti-establishment policy chuan ṭhalaite leh khawpuia mite thlawp a hlawh hle a ni. Party mala seat la hnem ber ni mah se, sorkarna siam an tum chu law-maker leh senate member ṭhenkhatte'n an dan avangin, eptu lamah an awm dawn ta thung a ni.

MFP hotu hlui, Pita chu dan zawm leh dan siam chungchangah nasa taka sawisel a nih avangin tun thla tir khan party hotu a nihna aṭangin a bang. Media company-ah share neia puhin July thla khan Pita chu parliament aṭanga suspend a lo ni tawh bawk.

MFP hotu thar Chaithawat chuan, "Tuna mi hi chu insiamremna lailawk a ni. Danin a remtih loh avangin, Pita Limjaroenrat chu parliament-ah MP ni thei rih loin, eptu hotu a nih angin a hnate a thawk thei rih lo a ni. Pita hi parliament-ah MP a nih leh veleh hotu ka nihna aṭangin ka inhnukdawk thei reng a ni," tiin thuthar lakhawmtute hnenah a sawi.

Pita chu party adviser a la nih tur thu leh parliament pawna party chetvelna chu a vil reng tur thu a sawi bawk a ni.