Canada Parliament-a Nazi veteran chawimawi avangin sawisel

Canada Parliament-ah Indopui II hunlaia Nazi tana beitu chawimawi a nih avangin eptu hruaitu, Pierre Poilievre chuan prime minister Justin Trudeau leh a kaihhruai sorkar chu na takin a sawisel.

Ukraine president Volodymyr Zelenskyy-a'n Canada a tlawh ṭum khan, House of Common-ah Ukraine aṭanga pem lut, kum 98 mi Yaroslav Hunka chu war hero aṭanga sawi a ni. House speaker Anthony Rota chuan gallery-a ṭhu, Hunka chu fakin Russia laka Ukraine independence-na tura beitu, Ukrainean hero leh Canadian hero tiin a sawi a, House member-te chuan standing ovation an pe hial a ni. Mahse a hnuah Hunka hi Nazi tana beitu a ni tih hriat a nih avangin, Rota pawhin Pathianni khan a thusawi chungchangah thupha a chawi tawh bawk. A thil lo sawi sual avang chuan mawhphurhna pawh a la vek tih sawiin, 'Kha thu ka sawi tur kha Parliament member leh Ukraine palaite pawh khan engmah an hre lawk lo," a ti.

Heti chung hian eptu hruaitu, Conservative leader Polievre chuan PM Trudeau-a beihna atana hmangin, ngaihdam dil turin a phut. PM hian a hma pawhin Nazi veteran hi a hranpain a lo hmu tawh bawk niin a puh a, House-a an chawimawina tur pawh hi a kaihhruai sorkar ruahman vek niin a puh lui tho a ni.

Indopui II lai hian Hunka hi Nazi command-na hnuaia awm, voluntary unit, 14th Waffen-SS Grenadier Division-ah a tel ṭhin a ni. He unit hi tribunal chuan war crime tia puh chungchangah thiam loh chantir lo mah se, division member-te hian indo lai hian Polish leh Juda civil mi tam tak thatah puh an ni. Khawthlang ram ṭangrual kuta an inpek hnuah, kum 1945 khan he unit hi First Ukrainian Division tiin a hming hi thlak a ni zui bawk.