France-in Niger aṭangin sipai leh ambassador lak chhuah tum

France president Emmanuel Macron chuan civil sorkar paihthla a, sipaite'n thuneihna an chelhna, Niger ram aṭang chuan France sipai leh ambassador lak chhuah a ni dawn tih a sawi.

Sipaite'n thuneihna an channa, Mali leh Burkina Faso ram aṭangin France hian a sipaite pawh a lo la chhuak tawh bawk a ni.

July thlaa Niger sipate'n civil sorkar an paihthlak hnuah, France hian a ram awp ṭhin, Niger-ah hian sipai 1,500 vel a la dah chhunzawm reng a ni. Sipai sorkar hian France chu an sipai leh ambassador la chhuak tur hian a lo nawr fo tawh a ni. Tun hnaiah France leh Niger inkar boruak hi a ṭha lo zual a, President Macron chuan an ram palaite hi embassy-ah hrek beh niin, sipaite hian ei tur an pek ang ang chu an ring niin a sawi.

Macron chuan Niger president aṭanga paihthlak tak, Mohammed Bazoum pawh a biak thu Pathianni khan a sawi. Niger rama an sipai la awmte chu a tahtawla la chhuakin, kumin kum tawpah chuan lak chhuah kim an ni ang tih a sawi. Niger ram indepedent hnuah civil sorkarin a ngen avanga an sipaite pawh hi dah chhunzawm zel an la ni tih a sawi bawk.

Niger-a sipai sorkar hi khawthlang ramte leh Africa ramte chuan an la pawm lo a, Mohammed Bazoum chu President-ah dah kir leh tura phutin, kawng hrang hrangin an ram pawh hi an hrek mek a ni.