Israel mite tan visa tel loin US luh theih dawn

US President Joe Biden-a sorkar chuan Israel khua leh tuite tan visa tel loin US luh a rem ti dawn tih Israel Foreign Minister Eli Cohen chuan a sawi. Cohen chuan he thu hi Thawhṭanni khan social media-ah post-in, US Visa Waiver Program (VWP)-a Israel telh a ni chu ram tana thu lawmawm tak a nih thu a sawi a, US-in a tiam angin, November thla aṭanga hman ṭan tur tih a sawi bawk.

US Department of Homeland Security (DHS) pawhin hemi chungchang hi sawiin, "Tunah chuan mipui hnenah puan tur engmah kan nei rih lo, mahse, DHS leh State Department chuan ni rei lote hnuah thuthlukna an siam ang," tiin a sawi.

Visa Waiver Programme-a tel thei tura pawimawh tak pakhat chu VWP-a tel ramte chuan visa tel loa US khua leh tuite luh an remti ve tur a ni. Amaherawhchu, Palestinian-te leh Arab American tam zawkte chu Israel hian an rama luhtir an phal loh avangin, VWP-a Israel lut tur hi Arab-American civil right tana beitute chuan an helh hle thung.

Israel chu VWP-a a luh theihna turin July thla khan, US leh Israel chuan memorandum of understanding an lo ziak tawh a, tunah hian trial period hman mek niin thla tawpah hian US chuan thuthlukna a siam ang. Amaherawhchu, dan hnuaiah intluktlanna a awm a ṭul avangin mithiamte chuan Israel chu VWP-a telh a nih chuan US Consitution a kalh dawn tiin an sawi.