Russia-in UN human rights council zawm leh tum

Nikum April-a Ukraine a run avanga UN human rights body aṭanga ban a nih hnuah Russia chuan member a nih leh theihna tur atan hma a la leh mek. Russia hian thla leha human rights council inthlan lo awm tur atana ram dangte thlawpna zawngin UN member-te hnenah Russia dinhmun tichiang turin lehkha a sem a ni. Russia hi a ram chhehvel leh Ukraine-a indonaah mihring dikna chanvo palzut nasaa puh a ni.

Russia palaite chuan mihring dikna chanvo chungchanga harsatna awmte chingfel tura Russia chu a inpeih thu sawiin, UN human rights council chu ram pahnih khatin politics thila hlawkna an hmuh theihna hmanrua atan chauha hman a nih lohna tura hmalak a huam thu a sawi bawk. Russia-in ram dangte hnena lehkha a semah hian Russia chuan council-a member ramte nena inzawmna ṭha leh thawhhona ṭha zawk siama, chumi kaltlanga mihring dikna chanvo palzut a nihna kawnga siam ṭhat ngai siam ṭhat a duh thu a sawi a ni. Russia hian UN human rights membership a hloh chhanah hian US leh a thawhpuite a puh bawk a ni.

Hetih lai hian Erik Mose kaihhruai, Commisssion of Inquiry on Ukraine report aṭanga a lan danin Russia-in Ukraine a beihnaah hian war crime chi hrang hrang, pawngsual, insawisak leh civil mi beihnate hmuh tur a la awm a ni. Kar hnih liam taa UN special rapporteur-in report a pekah pawh Russia rama mihring dikna chanvo tlak hniam nasatzia tarlan a ni a, indona sawiseltute man an nih dan leh sawisak an nih dante tarlan a ni bawk. Campaign group pathum, UN watch, the Human Rights foundation leh Raoul Wallenberg Center for Human Rights te chuan Russia chu human rights council member atana thlan tlak an la nih loh thu an sawi bawk a ni.

UN human rights council hi Geneva-a innghat niin member 47 an awm a, member tin hi kum thum term atana thlan ṭhin an ni. Member inthlan hi October 10 hian neih a ni dawn a, Russia hian Albania leh Bulgaria te nen central leh eastern european ramte tana reserved seat pahnih an inchuh dawn a ni. Human rights council member tur vote-a thlannaah hian UN general assembly member zawng zawng, 193 te chuan vote an thlak dawn a ni.