Tan in changtlung zawkah Imran Khan sawn a ni dawn

Pakistan thuneitu chuan Prime Minister hlui Imran Khan chu an ram khawpui Islamabad bula tan in changtlung zawkah sawn turin Court-in Thawhṭanni khan thuchhuah a siam tih PTI party chuan an sawi. Imran Khan-a party leh a ukilte chuan Rawalpindi khuaa Adyala Jail chu ram huaitu hlui awmna atan a awm zawk tiin Court hnenah dilna an theh lut a ni.

Khan-a ukil Naeem Panjutha-a'n Imran Khan chu sawn tura court a dil hnuah High Court chuan ruahmanna a siam a ni, tiin Khan-a lam hnai Zulfikar Bukhari chuan a sawi.

Imran khan hi August thla tirah khan eiruk thubuaiah thiam loh chantir niin, Attock district hmar thlang lama tan in hlui tawh takah dah mek a ni. He tan in hian attached bathroom leh tv pawh a nei lo a, a chhungte leh thiante tana tlawh pawh a harsat bakah, chanchinbu, lehkhabu leh eitur pawh pek theih a ni lo.

Court chuan Khan-a tan hun chhung kum thum chu suspend mah se, thuneitute'n ram thuruk tiput rua an puh avangin bail-a chhuah a dilna chu court-in a hnawl a ni.