South Korea-in kum 10 hnuah military parade a nei

South Korea chuan Seoul kawtthlerah sipai chakna phochhuakin ralthuam leh hmanrua a neih ṭhatte nen military parade lian tham tak a nei. Parade hi Armed Force Day denchhenin nimin khan neih a ni a, North Korea-in kumina ralthuam hman phal loh tam tak a test avangte, "nuclear-attack" submarine a siam chhuah avangte leh military spy satellite thawn chhuah a tum chhan letna atana parade hi neih a ni. Hei hi South Korea-in kum 10 hnua military parade a neih lehna hmasa ber a ni bawk.

Parade hi Seongnam-ah bul ṭanna neih niin, Seoul khawpui sumdawnna hmun lunlaiah km 2 zeta thui neih niin, sipai 7,000 lai an tel. Indona hmanrua 340 pholan niin, tank, laipui, indonaa hman chi thlawhna leh drone-te pholan an ni tih defence ministry chuan a sawi. Hyunmoo missiles, L-SAM missile interceptor, F-35 jet-te leh South Korea-ina fighter a siam chhuah hmasa ber KF-21 te chu mipui hmuhah phochhuah an ni bawk. Hyunmoo hi South Korea missile thar ber a ni a, North Korea nena intihbuai thulha hman tura duan niin mithiamte chuan an sawi. L-SAM hian km 50-60-ah missile a kap thla thei thung.

Armed Force Day lawmnaah hian South Korea leh United States-te chuan a rualin demonstration an nei bawk. US leh South Korea hi kum 70 lai an lo thawk dun tawh a, US Force Korea hnuaia Eight Army sipai 300 chuang parade-ah hian an tel nghe nghe.

South Korea President Yoon Suk-yeol chuan parade-naah hian thu sawiin, North Korea-in nuclear ralthuam a hmang a nih chuan na taka do let a ni ang a, an ramin a chhiat phah ang tiin a vau a ni.