Japan-in NKorea missile tichhe turin thu pe

Japan sorkar chuan an ram himna tiderthawng zawnga North Korea-in missile a enchhin a nih chuan kahthlak sak nghal turin a sipaite a hriattir.

North Korea hian long range missile enchhin a tum mek nia sawi a ni a, hei vang hian Japan Defence Minister Gen Nakatani chuan nimin khan thupek hi a tichhuak niin Nikkei chanchinbuh leh Kyodo News chuan an tarlang.

Defence ministry thupuangtu chuan thupek tihchhuah chungchang hi a sawi chiang duh lo a, mahse NKorea-in missile a kapchhuak a nih chuan a ṭul anga lo chhanglet turin an inbuatsaih tih a sawi.

UN Security Council resolution chuan NKorea hi ballistic missile technology a hman a khapsak a ni. Mahse tun hnaiah NKorea hian missile enchhin tumin a inbuatsaih mek niin Japan chanchinbu chuan an tarlang a ni.

Japan Foreign Minister Fumo Ki≠shida pawhin nimin khan US Sec≠retary of State John Kerry bia≠in, NKorea chungchang hi a sawi≠pui.

Hetihlai hian UN-in NKorea a hrek mekna dan bawhchhia a, ralthuam siamna tur hmanrua a phurh luh sak avangin Singapore-a Chinpo Shippping Company (Private) Ltd chu Singapore dollar 180,000 chawitir a ni. Singapore District Court chuan Chinpo hian nikum December thla khan NKorea ralthuam siamna tura a mamawh nia hriatte a phurh luh sak niin a sawi. Hei bakah Chinpo hi kum 2008-2013 chhung khan licence nei loa sumdawnna kalpuia puh a ni bawk.