Iran President-in Hollande chaw chhun eipui duh lo

France ram tlawha zin, Iran President Hassan Rouhani chuan France President Francois Hollande nena chaw chhun an ei dun tur chu menu-ah wine telh a nih vangin a kal duh lo.

Ram pahnih hruaitute hi Paris-ah chaw chhun ei dun tur an ni a, menu-ah wine an dah tel chu paih turin Iran hian a ngen a, mahse paih a nih loh avangin President Rouhani hi a kal duh ta lo a ni. A hma pawhin Iran palaite hian Italy hruaitu nena chaw chhun an ei dunna tura wine tel lohna menu siam turin an ngen tawh a, hei hi Italy chuan a lo remtihsak a ni.

UN-in Iran ram a hrekna a hlih hnuah, Iran hian France aṭanga Airbus thlawhtheihna leina turin inremna, dollar tluklehdingawn 25 hu an ziak. Iran hian Airbus hi 118 lei a tum. Hei bakah hian car siamtu, Peugoet chu Iran-a an kir lehna tur leh, Iran crude oil leina turin inremna an siam bawk.