Sweden-in raltlan 80,000 chhuah tir dawn

Sweden interior minister Anders Ygeman chuan an rama raltlan mi 80,000 te chu an thawn chhuak dawn tih a sawi.

Raltlante thawn chhuahna atan hian charter aircraft hman a ni ang.

Minister chuan, "Raltlan thawn≠chhuah ngai hi 60,000 vel niin kan hria a, mahse 80,000 pawh an tling chho thei a ni," a ti. Mahse an vaia thawnchhuah nan hian hun a duh rei dawn niin a sawi.

Kum 2015 khan mi maktaduai 9.8 awmna, Sweden ramah hian ramdang mi, himna zawnga luh dil mi 163,000 an awm a, Europe ram zingah diltu ngah ber zinga mi a ni. Luh dil zingah 55% chu pawmsak an ni.

Sweden sorkar hian tun hnaia an rama raltlan luh tumte khuahkhirhna turin ramri-a uluk zawka enfiahna tur dan a siam lailawk a ni. Germany leh Sweden ram hi raltlan leh dan loa EU rama luh tumte'n an pan nasat ber ram an ni. Raltlan luh tum an pun chak em avangin Europe ram hrang hrangte chuan ramri-te hungin, dan loa lut turte khuahkhirhna khauh zawk an siam mek bawk.

Nikum chhung khan raltlan maktaduai khat chuang zet chu Europe ram hrang hrangah an lut a, an zinga a tam ber hi Syria, Iraq leh Afghanistan aṭanga kal an ni. Raltlan tam tak hian Turkey aṭang Greece chu lawngin an pan a, tuipuia lawng chesualah thi pawh tam tak an awm a ni. Kuminah pawh nitin raltlan lut thar hi an awm reng a, UN chuan Greece-ah hian kuminah raltlan 46,000 chuang an lut tawh tih sawiin, kawng lakah thi mi 170 chuang an awm tawh bawk tiin a sawi.