Pentagon-in Afghanistan-a commander thar tur a puang

Pentagon chuan Lieutenant General John Mick Nicholson chuan Afghanistan-a international forces commander thar atana ruat a nih tih a sawi.

United States Senate-in a pawmpui hnuah, NATO land forces-a US Army commander ni lai Gen. Nicholson hian thla 18 zet Afghanistan-a international force hotu hna chelhtu, General John Campbell a thlak ang.

Defence Secretary Ashton Carter chuan thuchhuah siamin, "Gen. Nicholson hian Gen. Campbell-a'n Afghanistan mipuite tana a lo thawh tawhte chu a chhunzawm ngei ang tih ka ring tlat a ni. Afghanistan sorkar tihchakna tur pawhin theihtawp a chhuah ngei ang," a ti. Cater chuan Campbell chu United States Forces- Afghanistan commander leh, NATO Resolute Support mission commander a nihna anga a hnathawh leh a inpeknaah lawmthu a hrilh nghal bawk.

Afghanistan-ah hian US sipai 9,800 an awm mek a, Afghanistan security force-te training pein, firfiakte beih let dante an zirtir a ni.

US President Barack Obama chuan Afghanistan-a US sipaite chu a term zawh hma ngeia koh haw vek a lo tiam tawh a, mahse nikum October thla khan America sipai zinga 5,500 chu kum 2017-ah dah chhunzawm zel an la nih tur thu a sawi leh a ni.