NKorea-in missile enchhin a tum

North Korea chuan long range missile enchhin leh thuai a tum tiin Japan sorkar official pakhat chuan a sawi tih Japan-a Kyodo news agency chuan a tarlang.

Official chuan NKorea Tongchang ri-missile test-na hmuna satellite image an zirchianna aṭangin long range missile kapchhuak tur hian a inbuatsaih mek a ni, a ti.

Hetihlai hian UN Security Council member-te chuan January 6-a NKorea-in a ṭum li-na atana nuclear test a neih leh avangin hrekna pek belh dan tur an sawiho mek. Nuclear leh missile programme a kalpui avangin North Korea hi hrek mek a ni.

US Secretary of State John Kerry leh Chinese Foreign Minister Wang Yi-te chuan NKorea hrekna tur UN Security resolution thar siam ngei a ṭul thu an sawi a, mahse resolution siam tura hma an laknaah erawh hma an sawn chak lo hle.

Kum 2012 khan NKorea hian long-range rocket chu hlawhtling takin a lo enchhin tawh a, mi thiamte chuan hei hi inter-continental ballistic missile (ICBM) siam a tumna kawng pakhat niin an sawi.

Japan chuan kar khat chhungin NKorea hian missile hi a kapchhuak mai theih an rin thu an sawi a, mahse satellite image an zirchian chungchang erawh a tarlang tel lo.