Taiwan President-in S. China Sea a tlawh

Taiwan President, Ma Ying-jeou chuan nimin khan China nena an inchuh mek, South China Sea-a Taiwan thliarkar a tlawh.

Nimin zing khan Ma hian air force C-130 cargo plane hmangin Taiping Island, Itu Aba tia an sawi bawk hi a pan.

Taiping Island hi China, Vietnam, Malaysia, Philippines leh Taiwan-te'n neitu nih an inchuhna, South China Sea-a Spratly island group zinga mi a ni. He thliarkarah hian Taiwan chuan coast guard 200 bakah scientist leh medical worker-te a dah a ni.

US State Department thupuangtu, Mark Toner chuan Nilaini khan Taiwan President zin tur hi ṭha a tih loh thu a lo sawi tawh a, thliarkar a tlawh chuan a
ṭhenawm ramte nena an inkar boruak a tihchhiat phah a hlauhthawn thu a sawi.

US Secretary of State John Kerry pawhin ram hrang hrangte chu an ram inchuh chungchanga an buainate chingfel thuai turin a ngen bawk.

Vietnam ram hruaitute pawhin Taiwan President zin tum hi an sawisel bawk a, Phillipines sorkar chuan an inkar boruak tichhe zawngin tumahin hma la lo se an duh thu a sawi.