Sudan leh South Sudan ramri hawng dawn

Sudan President Omar al-Bashir chuan South Sudan nena an ramri chu hawng turin thu pek a tichhuak. Ramri hi kum 2011-a South Sudan a inlakhran aṭang khan khar a ni.

Ramri chungchangah hian Sudan ram pahnihte hi an intibuai reng a, ramri bula Heglig oilfield chu neitu zawk nih an inchuh a ni.

President Bashir chuan ramri hawng tura thupek a tihchhuah bakah, ramri-a sipai duty an dahte pawh inhnukkir turin a hriattir. Kar hmasa khan Bashir hian South Sudan-in oil thawnchhuahna atana Sudan infrastructure a hman man pawh tihniam sak a lo remti tawh bawk.

Kum 22 zet Sudan tualchhung indona a thlen hnuah kum 2005 khan inremna an siam a, inremna an siam ang hian kum 2011 khan South Sudan hi a indang a ni. South Sudan lam hian oilfield tam zawk a chang a ni.

South Sudan hi a indan hnuah, kum 2013 khan tualchhung indona a thleng leh a, President Kirr leh a deputy Riek Machar thlawptute an inbeih reng avangin civil mi tam tham tak chu himna zawngin an tlanchhe tawh a ni.