Denmark-in pem lutte tan dan khauh zawk a siam

Denmark Parliament chuan an rama inhumhimna dila luh tumte tana dan khauh zawk a siamna bill chu Thawhlehni khan a pass.

Bill pass tharah hian thuneitute chu an rama inhumhimna dila lutte chu an awm chhunga an enkawlna senso atan an bungraw hlu neihte laksak thei tura thuneihna pek an ni.

Thawhlehni-a Parliament-a bill thar ngaihtuahnaah hian a thlawp lamah vote 81 tlain, a duh loh lamah vote 27 chauh a thla thung.

He dan thar hmang hian Denmark Police-te chuan ramdang mi, an rama luh tumte chu an bungrua leh pawisa fai, Danish Kroner 10,000 ching chunglam chu an laksak thei dawn a, mahse inneih zungbun leh an mimal tana hlutna nei thilte erawh chu a huam tel lo ang. Refugee lutte pawh an chhungte nena an inhmuhkhawm theih hun chu kum khat aṭangin kum thum thlengin a tihkhaw≠tlai sak thei bawk ang.

Denmark rama pem lutte hnenah temporary resident permit a pek ṭhin chu a huam chin tihtawi a ni dawn a, hei vang hian refugee-te tan permanent resident permit neih a har phah tawh dawn a ni.

Bill-ah hian Denmark rama luh dilte hnena hamṭhatna pek pawh 10% a tihhniam a ni dawn a, refugee te chu an awmna tura siam centre pawn lama an khawsak phalsak an ni dawn lo bawk a ni.

Kum 2015 kha Denmark ramah hian raltlan mi 21,000 vel an lut a, Europe rama raltlan luh tamna ram zingah a tel a ni. Parliament-in raltlante tana khuahkhirhna khauh zawk siamna bill a pass tak hi Queen Margrethe II-in a hming a ziah hnan hun≠ah hman theih a ni ang.