Zika virus beihletnaah Brazil-in sipai chhawr dawn

Brazil sorkar chuan thosi aṭanga hri darh thei, Zika virus darh zel tur ven hna a thawhnaah sipai a chhawr dawn.

Thosi pian theihna tur hmunte thenfai hna thawk turin Brazil sorkar chuan sipai 220,000 vel a chhawr dawn a, an ni hian in tinah kalin, chhungkaw tin hnenah Zika virus darh zel tur venna kawnga an tih tur an ziahna lehkhate an sem dawn a ni.

Health Minister Marcelo Castro chuan Zika virus leng mek an do letna kawngah Brazil-in a hlawhtling thei rih lo tih a lo sawi tawh a ni, a ti.

Tun thlengin Zika virus hri veite enkawlna emaw, a vaccine emaw hi a la awm lo.

Minister chuan mipuite hnenah lehkha sem turin sipaite hi February 13 aṭang hian tirchhuah an ni dawn tih a sawi a, thosi pian theihna hmunte tihbo a nih theih dante hriattir an ni ang.

Zika virus hi pianna leh a thehdarhtu, thosi chi khat Aedes Aegypti tihrem tuma hma an laknaah Brazil chuan a la hlawhchham a ni tiin, he thosi hian yellow fever leh dengue pawh a thlen thei a ni.

World Health Organization chuan Zika virus hi America ram zawng zawngah a darh thei dawn niin a sawi a, Carribean, North leh South America-a ram 21-ah he hrileng hi hmuh a ni tawh.