Israel PM-in UN hotu a sawisel

Israel Prime Minister Benjamin Netanyahu chuan United Nations Secretary General Ban Ki-moon chu Palestinian-te thlavang hauh zawnga a ṭawng chungchangah sawiselin, a thusawi chuan firfiakte a cho phur zawk a ni, a ti.

Thawhlehni-a New York-a Middle East chungchang ngaihtuaha UN Security Council meeting neihah, Ban Ki-moon chuan Israel-in West Bank-a Palestinian ram a luahah Juda-te chenna tur in 150 sak belh a tum chu sawiselin, hei hi dan kalh a ni, a ti.

Ban Ki-moon chuan Israel-in West Bank-a Juda-te in sak belh zel a tum chuan an inkar boruak a tichhe zawk zel dawn a ni tih sawiin, a chetdan chu Palestinian mipui leh international community duhdan kalh a ni, a ti. Hei vang hian state pahnih siam tuma hmalakna chu Israel-in a thlawp tak tak em tih zawhna a siam phah thei niin a sawi.

West Bank, East Jerusalem leh Gaza Strip-ah hun eng emaw chen chu Juda-te chenna in sak chhunzawm zel a nih avanga lungawi lohna lantirin, tharum thawhna pawh a lo thleng fo tawh a ni.