Kum tlinglote hrenhranna dan Obama-an titawp

US President Barack Obama chuan naupang kum tling loten thil sual an tiha, an nungchang enthlak nan hrenhranna hmuna dah ṭhin chu a titawp. He thil hi tunhnaia naupang pakhat chanchin lungchhiatthlak tak vanga thleng a ni. He naupang hian dawr aṭangin rawksai ipte ang chi a ru a, kum hnih zet federal lung ina hren hran a nih hnuah amah a intihlum a ni. Mihang pakhat Kalief Browder chu a chungchang thu Court-a ngaihtuah hmasa loin kum thum zet lung inah khung a ni a, a hnuah a intihhlum phah a ni.

Obama hian a hun tawp hmain nawrna nasa tak a tawk mek a; lung in chep lutuk leh enkawlna senso hautak lutuk te, lung ina khung theih zat tihhniam te chu nawrna zinga langsar a ni. Obama chuan hrenhranna hmuna ṭhanglaite dah an nih hian an rilru lamah nasa takin harsatna a thlen a, an nun pum a tiralkhel a ni a ti. Lung ina khung hi chu a tawpkhawk ah nise, Misual chu midang tan leh ama tan ngeia hlauhawma a chet chauhin khung nise ṭha a tih thu a sawi.

Obama hmalakna thar hian lung in tang 10,000 zet a nghawng dawn a, chhuah an nih hunah US tan hmelthar thlentu tura beisei an ni. Kum tlinglo hrenhranna hmuna dah tihtawpna hi justic department-in an enfiah hnuah Obama chuan a puang a ni.

Khawvel pumpuia lung in tang hmun thuma ṭhena hmun khat vel hi US lung ina tang an ni a. Mahse, khawvela mihring cheng zawng zawng zaa panga chauh US ah hian an cheng thung. Tun dinhmunah whitehouse chuan lung ina khung mek mi 1,00,000 vel an awm niin a chhinchhiah a; Lung in tang zinga zaa 60 chu mihang leh Latin mi an nih laiin zaa 30 chu mingo an ni.